En noe…. tweedoezjendtwintjig!

Ja, jao waat kinne v’r hie noe van zegke?
Waat gebeurde d’r de aafgeloupe tied zoal in oos Neel?
Nieks heel sjpannends mer waat zeker zunj is,
D’r is gein nuutsblaedje meer, noojt meer “ ‘t Nuuts van Neel”.

Ouch nao jaorelangk troew zien klantje bedenend
Sjloot oze drogis in ’t nuuj jaor defenitief zien deur
Mer in deze tied kint os nieks meer verbaze
‘t Is jaomer, mer dit is get waat in eder dörp gebeurt

Waal waar d’r ein gezellige kersmert op ’t pleintje van Betje
Ouch eine “Dörpse” kersborrel onger de Linjeboum bie de Sjmeed
Ein prachtig kerstkonzaer inne kirk, oos eige hermenie leet zich heure
De kerssfeer heel biezonjer en kompleet

Mer waem op ‘t inj van 2019 zeker nog alle aandach verdeende
Waar ‘ne 105 jäörige bie os in Neel
Tante Nelly, ’n sjoon , nog rappe, kwieke dame
Vertelde lachend en dudelik wie ze dit deej.

“Wie ich zo aad bön gewaore?…. det kin ich uch vertelle,
iddere daag soep aete, opsjtaon mit eine lach en bön bliej,
geneet van ’t laeve, dan krieg geer net wie ich,
ouch eder jaor opnuuj, nog ein jäörke d’r biej.”

Dit kos zo mer ein nuujjaorswins zeen, van ein mam, ein sjoonmam en oma
Euvergrootmoder en van de aajste vrouw oet Neel
Waat is sjoner, waat kinne v’r os baeter winse
Es ein nuujjaorswins heel deep, heel deep oet ein Neelse zeel

Riet Bongaarts



Geef een reactie