Zo mer eine zomer in Neel!

Lekker zunke, lekker windje, lekker waerke
Zegk det waal,  ouch deze zomer waar helemaol top
Wanjele , fietse,  mit  40 grade  lekker  “niekse”
Of kieke nao de Tour, mit de sjnelste veurop

Ouch keke v’r nao Duncan,  wòn ‘t Songfestival mit ziene “Arcade”
Mesjtreech greep d’r naeve, Rotterdam krieg ‘t fees
De “Oranje Leeuwinnen” dees maedjes vóchte veur de titel
Helaas! de finale eindigde mit twee/nul verlees

En dan oze Max, waat eine coureur, zo geweun mer heel biezonjer
Hoondervelmomente mit de “Roje Sjtier” in de Formule 1
Zittend op ’t puntje van de sjtool leet hae idderein genete
Op zo’n zunjigmiddige waert greuts Nederlandj klein

Mer…..ouch weer in Neel deje de kinjer de Eerste Kemuuniej
Sjiek gekleid en daobie dae sjtraolende lach
Missjien al dinkend aan ein klein of groot kedootje
Det sjtrakkes toes, nao ein lang Mès, op häör wach

Eine gezellige wienwinkel versjeen naeve ’t Raodhoes
Dao kinne v’r terech veur get lekkers oet de fles
Nao jaore “nieks”,  weer ein laeg plek minder
Neel wins dees nuuj  wienboere alles sukses

In plaats van Neelder Kirmes dit jaor ein Dörpsfees
Heel get vereniginge ware daobie van de pertiej
Oos dörp genoot van eine keigezellige middig
Hepkes, drenkskes en meziek maak iddere Neelder bliej!

Det Neel zich 60 jaor geleje bie Remunj mos veuge
Waerde 1 augustus mit loejende klokke herdach
Op ´t Betjesplein belaefde men al vreug ein ingetaoge seremonie
Mer ouch Remunj heurde “oos”klokke, tiedes ‘t heise van de Neelder vlag

Tössedoor ging ein heel sjtök Neel gans veur de vlakte
‘t “Witte Dörp” besjteit inins neet meer
Väöl  van os zeen dao oojt gebaore en getaoge
En sjpeelde dao versjtöpperke of sjeldaot mit ein knaepkes-gewaer

Duurzaam , enerzjie-neutraal” zal dao geboewd gaon waere 
Net zo wiej in ’t “ Neeldervelt”
Dus nuuj bewoners zal oos dörp veurluipig blieve trekke
en gluif mer det ‘t ouch häör in Neel good bevelt

Riet Bongaarts


Geef een reactie