Zomer 2021

Eind juni kwaam ’t berich vanoet Den Haag det v’r vanalles weer moogde
Bliej waar idderein, mer dit “fees” waar helaas van korte doer
Want nog gein drie waeke later, midde in de zomer
loog ’t Corona- virus op iddere hook in Nederlandj weer opnuuj oppe loer

De meiste evenemente waerde verbaoje, aafgelas of versjaove
zo ouch Solar in de Weerd, aan de Maasplasse in Remunj
väöl regelwerk waat heel get miense same daoveur höbbe motte verzitte
eine sjtreep, eine hele dieke sjtreep d’r door, jaomer, doodzunj….

En of ’t nog neet genog waas , leet in juli moder Maas zich nog ins gelje
ze dölde gein water meer, ze sjtuurde alle natigheid trök
Det zorgde in väöl dörpe veur heel, heel väöl sjaaj en eine enorme watermassa
en wie biej eder hoog water haaj Neel , wiejer weg van de Maas, alweer gelök

Nog effe later woekerde in zuidelikke lenj enorm felle bosbrenj
Vluchtende elders mit klein kinjer die neet ins meer wiste wo haer
Men vreug zich aaf “ waat is toch allemaol aan de handj noe”?
Ligk ech alles aan de verangering van ’t waer?

Mer de Neelder zomer geit aevegood veurbiej ondanks alle vuur en water
en in gedachte nome väöl miense aafsjied van Peter R., bekinde misdaadjournalis
eine echte fijne, integere en oprechte BN’er, dae veur idderein opkwaam
pien, neet allein veur zien naobesjtaonde , mer veur väöl miense ein groot gemis

Mer d’r is ouch plezeriger nuujts en ech waal get biezunjers
want sinds kort sjtreelt “de lezeres” in de Hoeksjtraot ’t oug van edere passant
en door dit werk oppe ziejgevel van de Kleine Tovenaar in de Hoeksjtraot
kwaam d’r ein heel apaart kunswerk biej in oos eige Neelderland

En dan nog dit! vergaet veural neet ’t gezellig uitje in ’t wiekend van 5 september
veur oma en opa, pap en mam en veur häör groot en kleinste kindj
Kom nao de “Rommelroute” in Neel van 10 toet 3 oer op deze zunjig
sjnuffel rondj, laot uch verrasse en waem wit waat g’r hiej nog allemaol vinjt

Riet Bongaarts, augustus 2021









Geef een reactie